Tutti l’anni per a Santa di u Niolu ci sò e tradiziunale serate è cuncorsi di Chjama è rispondi. Accade dinù ogni tantu chì l’impruvisatore cantinu canzone tradiziunali o amparate in lochi soi. Hè ciò ch’ellu face quì Roccu Mambrini dettu  » U rusignolu di Ziglia » in u 1983 dop’à e stonde d’impruvisazione. Ci canta una canzona chì si chjama u pastore di Calinzana. Issa canzona poca cunnisciuta hè un cantu tradiziunale di u paese balaninu di Calinzana. Cii parla d’un giovanu pastore chì parte nant’à u cuntinente pensendu pudè campà stonde più sebbiate è avè una vita menu difficiule. Ci conta l’addisperu di u pastore quand’ellu scopre a realità d’un mondu ch’ellu ùn cunniscia micca è ch’ellu si figurava. Di sicuru rigreta d’avè tralasciatu a so vita per parte in quellu cuntinente.

Eccu e parole :

Maladettu sia lu ghjornu
Ch’eo chitai Calenzana
Cum’è un lupu a panza piena
Chì abbandona la so tana
Per andà in cuntinente
À fà una vita galeriana.

Mule, pecure è muntoni
Tuttu què m’aghju vindutu,
Le mo economie spese
Ne sò scalzu è mal vestutu.
‘Ùn ci puderete crede
Quantu mi ne sò pentutu.

A matina di bona ora
O quantu mi face pena
Cum’è cantu di pernice
Sentu fiscà la sirena.
Aghju datu d’a mio testa,
è pagu di la mio schjena.

In terra cuntinentale
N’ùn ci aghju signatu patti,
o cumu rimedià

l’affari quandu sò fatti

Ma si campu, o Calinzana

Spergu di ghjunghje à truvatti.

Commentaire réalisé par Geronimi Josepha.