Quist'annu a tradizionale serata di u chjama è rispondi di Natale in Pigna s'hè fatta u 28 di dicembre à l'auditorium.

Sò prisenti da a manca à a diritta : Ghjvan-Luiggi Villanova, Ghjaseppu Micaelli, Francescu Simeoni, Carlinu Orsucci, Carlu Storai, Francescu Luciani, Cristofanu Limongi dettu « Tittò », Petru Santucci.

Hè Carlinu chì apre u ballu, « ricevite u salutu ch'ellu vi manda Carlinu ».

Subbitu subbitu u sughjettu ammentatu hè quellu di a scena è a so descrizzione, i ghjucoli prisenti ind'è u chjerchju di l'improsa « quant'à mè Casalonga ci piglia per criature. »

Cum'è spessu i pueti ringrazianu l'urganisatore per l'invitu ogni annu in Pigna è u sughjettu sculiscia nant'à u vinu di u tavulinu è a manghjusca. « issa sera simu quì per a rima è per e muse, cume stretti di canella ùn ci vole à truvà scuse, avà u bichjeru hè pienu è trinchemu à a saluta ».

I ghjuculu di i bambini sò u sughjettu principale d'issa serata è e muse sbuccianu à pocu à pocu.
I pueti facenu intervene i ghjochi prisenti nant'à a scena « quessu hà a cresta cum'è tè. » « sta sera custì hè festa ci femu tutti piacè, ma a quistione di a cresta ùn imponda cà mè. » ci dice Tittò, a so capillera essendu sempre sughjettu d'improsa scherzosa. « è risponde à lu mio invitu è cantà una stundarella, ùn ti basta u ghjalettu ti daraghju a viturella. » « Lascia corre a viturella, sta à sente issu riturnellu, perchè di pettu à ellu ci n'hè unu chì hè più bellu, ùn ti sì manc'avvistu ch'aghju purtatu u mio fratellu » risponde Tittò parlendu di u ghjallu.
« Ma s'è no fighjemu l'orsu, u so culore hè giallu, in fatti di puesia scusate m'imballu, una stonda ch'o u feghju, vedi s'assumiglia à Carlu ».

Hè a prima volta chì vedimu à Carlu Storai nant'à a scena di Pigna. Hà una voce putente è u so parlatu hè un mischiu trà u talianu è u corsu.

I pueti si stuzzucanu, si macagnanu sempre cù i ghjucoli cume sughjettu, è u rispettu permette d'inframette a macagna.
Quandu Petru Santucci attacca à Carlinu Orsucci, a risposta hè naturale : « a sai bè ch'o ti tengu, a sai bè ch'o ti stimu, per risponde à e to chjame sò sempre statu u primu, ma si face rimarcà, eiu ùn m'assumigliu à nimu. » « per assumiglià à mè, ci vulia à mette una scimia ».
« Eiu t'aghju da dì qualcosa, stà à sente a mo voce, cù a faccia à l'aritrosa ma a rima a più feroce, ùn ferà micca Maria ma jean-Louis ferà a croce. » « Dunque eiu seraghju a croce eppo in testa marchjeraghju, tù serai a catena, eiu ti strascineraghju, ».

À partesi di 40 minuti, i pueti volenu cambià di sughjettu, e muse sò passate, a dice Petru Santucci « s'è tù voli cambià sughjettu, dumandemu à issa ghejnte. » ( u publiccu.)

Sin'à avà, Francescu Luciani ùn s'hè ancu intesu, hè statu chjamatu parechje volte è Carlinu lampa dinù una strufata per ellu : « di sente impruvisà u giovanu di Petralba, osinnò ch'ellu a faccia cù l'aria di Ghisonaccia. » « ma rimarca o Francè chì sta sera ùn sò in cicca, aghju chjappu u catarru è voce ùn aghju micca. »

À partesi di 50 minuti, si sente un'altra voce chì s'alza da u publiccu, hè quelle di Bastianu Campana di Canale. Stuzzica i nostri tarcani è s'affaca nant'à a scena. Pierre Santtuci li risponde : « s'ellu si chjama Campana, ch'ellu facci a ciccona. » « Tù sì u benvenutu avà chì mi si vicinu, à tutti ci porti aiutu, sta sera per u bambinu, è s'è tù voli cantà, ùn stuzzicà à Carlinu. »

Issu passu d'impruvisazione si chjode cù Ghjaseppu Micaelli chì chjama a giuventù « tutti issi cari pueti, eiu ùn li sentu più. »

Commentaire réalisé par Geronimi Josepha.