Quist'annu a tradizionale serata di u chjama è rispondi di Natale in Pigna s'hè fatta u 29 di dicembre à l'auditorium.
U scopu era di rende ummagiu à u rusignolu di Ziglia, Roccu Mambrini, presidente d'onore di l'associu di u chjama è rispondi ch'ùn hè pusstu vene l'anu passatu.

Hè a giuventù chì principia, cù Paul'Antone Squarcini, giuvanottu di a Gravona, di u paese di Cuttoli. Paul'Antone hà d
odeci anni è hè a prima volta ch'ellu canta in Pigna. Passanu Paul'Antone, Brandon Andreani, Francescu Luciani, Josepha Geronimi, eppò venenu i pueti cunfirmati Francescu Santini, Cristofanu Limongi dettu « Tittò », Paulu'Santu Pariggi, Ghjacumu'Santu Guidoni, Francescu Simeoni, Ghjaseppu Micaelli, Carlinu Orsucci, Ghjuvan'Luiggi Villanova.

Cummincianu a chjamà quelli chì sò stati quassù è ch'ùn sò fallati nant'à a scena : Ghjacumu Ferrari, Luiggi Savignoni chì falanu inseme.

L'onore fattu à u rusignolu hè u « leitmotiv » di a serata « Simu vinuti per cantà, anziani è zitelloni, partuti da luntanu, per fà onore à Ferrari à Mambrini è à Savignoni. » lampa Francescu Simeoni.
« Sta sera sò onoratu d'una curona di giuventù, aghju intesu i so canti, sò carchi di virtù, lasciatu aghju a piazza chì avà ne possu più. » risponde Roccu.

A macagna hè sempre presente dinù, dice Carlinu à Roccu : « nant'à u so futtogli pari un ghjudice di pace. »
Passanu a manu à Ghjacumu Ferrari ch'ùn si « sente mancu vechju quand'ellu fideghja ind'è u spechju », è chì ringrazia a ghjente d'esse tantu unuratu « sò cuntentu d'esse cù voi quì è un grande ringraziamentu à l'amicacciu Carlinu. »

Tuttu i pueti rendenu umaggiu à i trè puntelli di l'improsa, è Paulu'Santu Pariggi chì si mette in ballu : « À mè tutti e trè sta sera, o mi parite belli fiori, ci n'hè grande è chjuculelli è di tutte i culori, è nantu à sti futtogli, mi parite imperatori. »

Savignoni è Pariggi danu forza à u giovanu Squarcini chì s'hè sbagliatu circhendu u so ultimu filare : « hè vera ch'à u principiu anch'eiu mi sò sbagliatu ma devi cuntinuà è ùn sia emuziunatu. », « Facine puru un'antra eppò mettici a cura, chì da l'idea à u cantu, ne sì a più bella fiura è ùn fideghji micca à elli chì ti facenu paura. »

U chjama'è rispondi tene issa virtù pedagogica, a lea trà e generazioni hè sempre più viva, Paulu'Santu Pariggi tene u fiatu è chjama à spessu a giuventù : « Ma d'avè li messi quì ne, quant'à mè sò fatti strani, v'anu messu à un'altura, ch'ùn parite più umanu, o dimmi ciò chè tù pensi amicacciu Andreani. » « Ma chì voli ch'o ne pensi, sta sera Paulu'Santu, eiu sò ghjuntu quì, incù u piacè tamantu, ma i nostri trè amichi, t'anu a piazza di u santu. »

A magia di l'improsa hè dinù d'inframette altri personi è d'ùn impruvisà in chjerchju à dui, di fà rimà e parolle cù a casata di i pueti per fàlli intervene, hè cusi chì i sughjetti s'allerganu. Hè ciò ch'ellu face Paulu'Santu Pariggi una volta chì Brandon s'hè rasseranatu è lampatu ind'è u cantu impruvisatu.

Dop'à dui strufate cù Ghjiseppa Geronimi, Brandon Andreani, chjama à Ghjuvan Federiccu Terrazzoni, u pueta di Sant'Amanza, ghjuntu in ritardu è statu ind'è i scalini. Subbitu subbitu, hè Paulu'Santu Pariggi cù u so estru magagnosu chì piglia a parolla : « Sta mi à sente o amicacciu, se di fallà ùn ai laziu, a ti dicu subbitu subbitu, chì sta sera ùn ti ringraziu, se tù ci vole stà luntanu, d'esse statu in Bunifaziu. »

Commentaire rédigé par Geronimi Josepha.