Chjami e rispondi, Felicetu, 1983, Partie 1

A l'uccasione di una serata urganizzata da u patrone di l'usteria, una manata di pueti è un publicu d'amatori si sò aduniti à u tavulone, è certi sò appughjati à u cuntuaru. A l'iniziu di l'arregistramentu, Minellu canta Carlu in lode, chì si ne stà mutu (1'36''...quandu ci serà Parigi ti toccherà a suttana) è Roccu fà u ghjelosu cù e so manere tranquille. Ma Minellu lascia a piazza à Carlu, chì incù a so eleganza rimanda à Roccu u cumplimentu : « ...a medaglia a docu à tè » ( 3'14'')

Suiteghja dopu un longu dialogu, a pena interrotu da Ambroggiu (7'09''), quandu Roccu fà per attacà u silenziu di l'aschesi, ma subitu ritira i so detti, ciò chì li vene rimpruveratu da Carlu : « incù tutte le to muse, prima azzinca un focu, è dopu prisenta scuse » (15'18'').

U chjama è rispondi ripiglia trà i dui amichi, ma poi Carlu, dicendu :« sò malatu » (18'29''), abanduneghja a partita. Allora Roccu canta nove strofe da solu, chjamendu senza successu l'altri pueti, è dopu si tace dopu ad avè metafuricamente dettu« u focu hè spentu » ((25'15'').

Ma dopu à qualchi cummenti di u publicu, Carlu ripiglia à cantà (26'10'') è u chjama è rispondi riparte nantu e qualità guerriere di Roccu . Ma Minellu fà u paceru(28'17'') « avemu signatu a pace », e Roccu li risponde chi« mancu ti vogliu fà guerra », e li ramenta ch'elli sò quì per « amusà a sucetà » (28'51'').